O delegado do Estado no Consorcio Zona Franca de Vigo, David Regades, asegurou que se alcanzará un acordo respecto ao convenio ‘Abrir Vigo ao Mar’ xunto ás outras administracións implicadas –o Concello olívico e a Autoridade Portuaria– “a curto prazo”.

Preguntado polos medios tras unha rolda de prensa celebrada este luns en Vigo, incidiu na necesidade de que os representantes da cidadanía alcancen acordos e definiuno como “fundamental”.

Así mesmo, en relación á situación do convenio que permitiu a construción do paseo marítimo das Avenidas, do que parte se derrubou o pasado verán durante a celebración do Marisquiño, avanzou que percibiu “vontade” de chegar a un acordo por parte do alcalde, Abel Caballero, e o presidente do Porto, Enrique López Veiga.

En concreto, este convenio debe ser revisado en virtude da lei de procedemento administrativo e, se non se alcanza un acordo, será liquidado en outubro, unha posibilidade respecto da que López Veiga se mostrou partidario, xa que eximiría ao Porto do abono de 400.000 euros anuais á Zona Franca por asumir o custo da construción do espazo.