A deputada do BNG no Parlamento autonómico Montse Prado solicitou este mércores a comparecencia do conselleiro de Sanidade, Jesús Vázquez Almuiña, para que explique “o recorte” levado a cabo por Povisa na súa atención aos pacientes do Servizo Galego de Saúde (Sergas).
En declaracións aos medios acompañada polo comité de empresa deste hospital privado de Vigo, a portavoz de sanidade do Bloque no Lexislativo asegurou que houbo unha comunicación interna da empresa na que “literalmente” se daba a instrución de “reducir todas as actuacións en doentes do Sergas que non lle acheguen ningún valor engadido”.
Ademais, e segundo denuncia Prado, o centro tamén aposta pola “liberación de recursos para mellorar cada vez máis o tempo de resposta a doentes privados”.
Para a deputada do Bloque, esta información “fai saltar todas as alarmas” porque “afecta ou pode afectar á cidadanía que ten asignada a súa asistencia sanitaria pública” neste hospital privado, en virtude do convenio que mantén co Sergas.
Así, os nacionalistas consideran “preocupante” o contido deste comunicado interno, porque “ou ben supón unha substitución dos criterios científicos que debe rexer as consultas”, ou ben “ata agora facíanse consultas, probas ou intervencións que non achegaban valor engadido ás persoas que se sometían a elas, co consecuente incremento do risco de efectos secundarios”.
“En calquera dos dous casos están en cuestión os criterios científicos usados e pode comprometerse a saúde das persoas atendidas, ao que habería que engadir o uso de recursos públicos que tiñan que ir para financiar a atención sanitaria dos doentes do Sergas destinados a incrementar a actividade privada”, denunciou.
“OPACIDADE” NAS CONTAS DE POVISA
Así mesmo, Montse Prado falou de “a opacidade e o escurantismo habitual” de Povisa á hora de presentar a súa contabilidade, posto que “non ofrece información desagregada do gasto que destina a atender a doentes públicos e privados”.
Ademais, asegurou, “utiliza o mesmo persoal” para ambos os sistemas sanitarios “e descoñécese se as innovacións tecnolóxicas as imputa ao concerto ou corren por parte do hospital”.
Por todo iso, o BNG ve “necesario” que o Sergas aclare “de inmediato” os criterios utilizados por Povisa e pide, ademais da comparecencia de Vázquez Almuiña, que se investigue o contido do comunicado interno.
