A Federación de Asociacións Veciñais de Vigo ‘Eduardo Chao’ iniciará unha campaña de recollida de firmas para reclamar ao Concello olívico e á Xunta de Galicia a posta en marcha dun parque de vivendas públicas para casos de emerxencia social.

Así o explicou en rolda de prensa a presidenta da Federación Veciñal, María Pérez, quen advertiu de que os casos de desafiuzamentos na cidade olívica están a incrementarse, e que as familias con escasos ingresos ou que cobran unha Risga son especialmente vulnerables, porque “ninguén lles aluga” unha vivenda e, ademais, non poden asumir o elevado custo do mercado de aluguer.

María Pérez asegurou que, cada poucos días, hai familias que chegan ás oficinas da Federación pedindo axuda, polo que instou ás administracións a actuar ante o “grave problema” que afecta a Vigo, xa que “a Federación non é unha inmobiliaria” e non pode axudar na medida en que lle gustaría.

A presidenta da Federación lamentou que non haxa unha alternativa habitacional para as familias que, por falta de pagamento ou por resolución de contrato, quedan “na rúa”. “Facilitarlles unha pensión durante uns días non é unha solución. Teñen nenos pequenos, teñen as súas pertenzas, as súas mascotas,....”, lembrou.

Por iso, instou ao Concello a pór en marcha un parque de vivendas públicas, e lamentou que o goberno de Abel Caballero non subscribise o convenio de vivendas baleiras da Xunta.

No caso de que non haxa resposta do goberno municipal, a Federación reclama que sexa a Xunta a que tome medidas, á vez que lembrou que, só en 2018, “case medio milleiro de familias” tiveron que abandonar as súas vivendas de aluguer na cidade por non poder facer fronte ao pago das mensualidades.