O Ministerio de Fomento iniciará este martes, 15 de maio, a execución das obras de reforzo de iluminación na estrada N-120 no termo municipal de Ponteareas. Unhas obras que chegan con atraso.
En concreto, informou o Ministerio de Fomento nun comunicado de prensa, esta actuación ten por obxecto a instalación de iluminación nas interseccións canalizadas dos puntos quilométricos 646,120 e 648,620 da N-120, así como a reparación e reforzo da iluminación existente nas interseccións dos quilómetros 645,420; 648,015 e 649,650.
Con estes traballos, concreta Fomento, preténdese mellorar “as condicións de seguridade viaria tanto para a circulación de vehículos como de peóns”. O orzamento de adxudicación destas actuacións ascende a un total de 117.769,22 euros (IVE incluído), puntualiza o Ministerio de Fomento.
Foi en outubro do 2016 cando o alcalde de Ponteareas, Xosé Represas, remitiulle ao Xefe de Demarcación de Estradas do Estado en Galicia o acordo adoptado pola Plataforma de Afectados pola N-120, na que solicitaban “de xeito urxente” a contratación das obras incluídas no proxecto redactado polo Ministerio de “reforzo de iluminación en la N-120”.
