Luisa Piñeiro (PP), alcaldesa en funcións de Moraña (Pontevedra), compareceu este xoves nos xulgados de Pontevedra, investigada nunha peza separada da chamada Operación Patos, relativa a supostas irregularidades na adxudicación dunhas obras dun campo de fútbol subvencionadas pola Deputación de Pontevedra, que entón presidía Rafael Louzán.
Segundo confirmou a propia rexedora, que xa declarou hai anos como testemuña, a súa citación como investigada nesta causa fíxose “con moita prema” e non tivo acceso á información do procedemento, por iso acolleuse ao seu dereito a non declarar.
Nesa citación recóllese que é chamada a comparecer ante o xulgado como suposta cooperadora necesaria nunhas presuntas irregularidades relativas á tramitación dunha modificación (para ampliar) do proxecto do campo de fútbol.
Ese expediente tramitouse en 2013 e a Fiscalía sospeita que houbo irregularidades na adxudicación á construtora Eiriña (cuxo dono, Enrique A.P., é considerado o xefe da trama) dunha ampliación do proxecto.
Ademais da rexedora, nesta peza separada tamén figuran como investigados Enrique A.P e outro directivo de Eiriña; a exsecretaria provincial do PP, Begoña Estévez (que tivo responsabilidades de contratación na Deputación); o arquitecto que asinou o modificado da obra; dous empresarios; un técnico da Deputación; e o propio expresidente da institución provincial e actual presidente da Federación Galega de Fútbol, Rafael Louzán.
