A Xunta defendeu este xoves o cobro do canon de regulación sobre a presa de Eiras (que o goberno de Vigo anunciou que impugnará), e lembrou que esa taxa se limita a repercutir os gastos nos que incorre Augas de Galicia polos labores de control e mantemento do encoro que abastece a cidade olívica e outros nove municipios.
A Administración autonómica saíu ao paso das acusacións do rexedor olívico en funcións, Abel Caballero, quen denunciou que a Xunta pretende cobrar a Vigo máis de 654.000 euros anuais “por facer nada” na presa de Eiras, xa que o encoro é xestionado polo Concello, a través da concesionaria Aqualia.
Con todo, a Xunta precisou que é Augas de Galicia a que asume esa xestión, realizando labores de mantemento para garantir o bo estado da presa e a seguridade, ademais do control da calidade das augas, mentres que o Concello de Vigo cobra aos usuarios, a través de Aqualia, polo abastecemento.
A ese respecto, puntualizou que o Concello de Vigo podería aforrarse ese canon se accedese a asumir a xestión do encoro mediante un convenio coa administración autonómica, unha posibilidade que “rexeitou ata o momento”.
Por contra, sinalou, o goberno municipal negouse a pagar a taxa desde que se empezou a aplicar, en 2014, polo que a débeda do Concello vigués xa supera os 3 millóns de euros. Así mesmo, indicou que Vigo é “o único que se nega a aceptar a súa obrigación de abonar o canon de regulación”.
