O desafiuzamento de Isabel, unha veciña de Vigo con dúas fillas menores que leva un ano sen pagar o aluguer da súa vivenda, consumouse este venres e, ante a petición de axuda desta muller e da Federación Veciñal Eduardo Chao, que a está asesorando, o Concello reiterou o seu compromiso de subvencionarlle o aluguer dunha nova vivenda cando a atope.

O desaloxo desta familia estaba previsto para principios de semana, pero a Federación conseguiu que se aumentase o prazo en catro días para facilitar que puidesen recoller as súas cousas e buscar un aloxamento alternativo.

Este venres a media mañá fíxose efectivo o desaloxo, coa entrega de chaves ao representante dos propietarios, e Isabel deixou a vivenda, aínda que non conseguiu atopar un domicilio alternativo que se adapte á súa capacidade económica (é perceptora da RISGA).

Tanto esta veciña como a Federación lamentaron que non haxa pisos en aluguer adecuados para esta familia por menos de 350 ou 400 euros, e fixeron un chamamento ás institucións para que dean unha solución a esta familia. “Non temos onde ir, prestáronnos unha furgoneta porque non temos outro sitio“, lamentou.

OFERTA DO CONCELLO

O goberno municipal de Vigo referiuse a este caso, que di coñecer “desde 2017”, e apuntou que Isabel e as súas fillas están a ser atendidas polos servizos sociais do Concello, e mesmo participaron en distintos programas da Concellaría de Benestar Social.

“Desde hai tempo se lle ofreceu apoio do Concello para o pago do aluguer dunha nova vivenda que a familia atope. Este compromiso do goberno vigués segue vixente e, no momento no que a muller conte cun novo piso onde residir, o Concello cooperará coas cotas de pago”, apuntaron fontes municipais.