A Policía Local de Vigo rescatou un pito de curuxa que foi localizado na vía pública e estaba desnutrido, posiblemente por que se caeu do niño e a súa nai non podería alimentalo.

Segundo informaron fontes policiais, o rescate tivo lugar na mañá deste xoves, cando unha dotación da UMIR (Unidade Ambiental de Intervención Rural) acudiu a un aviso pola localización desta cría, nunha zona da parroquia de Beade.

Os axentes atoparon o pito en mal estado, desnutrido e con aspecto de levar polo menos un par de días nesa situación, polo que o recolleron e puxeron os feitos en coñecemento de responsables do refuxio de aves de Cotorredondo para que recollesen o animal.

Por outra banda, e tamén con respecto aos animais na vía pública, a Policía Local de Vigo fixo un chamamento aos condutores para que teñan especial precaución ao circular pola Avenida de Arquitecto Palacios, xa que se detectou a presenza de xabaríns deambulando pola calzada en horas nocturnas.