A Xunta de Galicia condicionou a firma dun convenio para a construción dun instituto no barrio vigués de Navia a que o Concello olívico ceda os terreos necesarios para iso. Nesta liña, resaltou que esta entidade “nunca” asinou un acordo destas características dun modo previo á cesión do espazo necesario para acometer as obras.
Tamén lembrou que, para executar esta acción, é imprescindible que o municipio tramite o plan parcial de Navia, o que, segundo o Goberno gallgo, supón que sexa da vontade do Concello da cidade olívica da que dependa a construción do centro educativo.
CRÍTICAS DO ALCALDE
Pola súa banda, o alcalde de Vigo, Abel Caballero, demandou á Xunta un convenio asinado no que se comprometa a levar a cabo a construción do instituto como condición para cederlle os terreos necesarios para iso.
Nunha rolda de prensa celebrada na cidade olívica, Abel Caballero detallou que recibiu unha carta procedente do Executivo autonómico este luns na que se instaba ao Concello a ceder os terreos precisos para acometer as obras do centro educativo.
Con todo, o rexedor vigués asegurou que esta comunicación non compromete que a actuación se vaia a levar a cabo, polo que advertiu de que podería efectuarse a cesión dun espazo por parte do Consistorio no que, finalmente, non se executasen as obras prometidas.
Por esta razón, Caballero esixiu ao Goberno galego a remisión dun convenio asinado no que apareza reflectida a partida orzamentaria que se destinará a esta actuación e o compromiso do Executivo autonómico de levala a cabo.
