Vigo será a sede galega dunha aceleradora de empresas impulsada desde Portos do Estado mediante un plan de impulso para a innovación no sector a través dun fondo de capital.

Nunha rolda de prensa celebrada en Vigo este martes, a responsable da área de Innovación de Portos do Estado, Jose Llorca, detallou que o obxectivo é incentivar a aposta pola innovación no sector loxístico portuario mediante un financiamento de ata dous millóns de euros por proxecto cuxo reembolso dependerá do éxito da proposta emprendedora no mercado.

Segundo indicou, esta iniciativa, que tamén levará a cabo noutro once cidades españolas, aspira a que os emprendedores coñezan as necesidades do sector loxístico portuario e poidan aplicar os seus coñecementos para dar resposta ás mesmas. Así, este fondo de capital busca apoiar a especialistas en robótica e impresión 3D, entre outras disciplinas.

Jose Llorca avanzou que se espera que o prazo da convocatoria este aberto antes deste verán e que non se peche ata outono co obxectivo de proceder á adxudicación do apoio económico ao redor de finais deste ano.

O presidente da Autoridade Portuaria de Vigo, Enrique López Veiga, sinalou que esta iniciativa, que está dirixida non só a start-ups senón tamén a empresas xa constituídas que queiran abrir unha nova liña de negocio, foi presentada na cidade olívica este martes ante un grupo de emprendedores.