O xuíz de garda decretou prisión provisional comunicada e sen fianza para o home de 60 anos, residente en Vigo, detido por un suposto delito de malos tratos e un intento de homicidio perpetrados contra a súa parella, unha muller de 40 anos, nunha vivenda na que se atopaba o fillo menor de idade da vítima.

Os feitos dos que se acusa a este home tiveron lugar este martes ao redor das 6,10 horas na rúa Numancia onde, supostamente, o detido causou graves lesións na cabeza á vítima. Os axentes, que foran contactados por un particular, desprazáronse ata o domicilio, no que atoparon a muller no chan e, ao seu lado, ao seu fillo de once anos.

Posteriormente, a muller foi trasladada ao hospital e o seu fillo detallou aos policías que se espertou ao escoitar os berros da súa nai ao ser agredida polo home que, supostamente, fuxira tras os feitos.

Tras trasladar ao menor xunto a unha coñecida da vítima e proceder á custodia desta no hospital, contactouse con distintos corpos policiais e da Garda Civil.

Este mércores ás 10,00 horas localizouse en Ourense o vehículo no que fuxira o presunto agresor, polo que se estableceu un dispositivo de vixilancia na zona con unidades de paisano da Policía Xudicial. Posteriormente, ao redor das 13,00 horas, un vixiante de seguridade da estación de tren contactou coa Comisaría de Ourense e notificou que o individuo se atopaba nese lugar.

Finalmente, os axentes desprazáronse ata a estación, detiveron ao presunto agresor. O home pasou na mañá deste xoves a disposición do xulgado de garda, que decretou o seu ingreso en prisión.