O candidato do PP ao Congreso Daniel Lacalle asegurou que, se este partido volve estar á fronte do Executivo central tras as próximas eleccións do 28 de abril, “as pensións de xubilación revalorizaranse” e advertiu do “risco” que comporta vinculalas co Índice de Prezos ao Consumidor (IPC), xa que este podería arroxar valores negativos.

Previamente á súa participación nun encontro con empresarios en Vigo, o economista e asesor persoal do presidente do PP, Pablo Casado, remarcou que “todos os países da Unión Europea (UE) revalorizan as súas pensións con respecto a diferentes baremos”. Deste xeito, incidiu en que o seu obxectivo é que estas se incrementen “máis” que o IPC.

Ademais, apostou pola recuperación do Pacto de Toledo, así como por elaborar unha “política de Estado” a este respecto que non estea influída por un partido determinado.

Precisamente, esta semana o PSOE instaba ao PP para aclarar as afirmacións de Lacalle, que recalcara que o “debate” das pensións se debía situar en relación á porcentaxe do seu recorte.

O economista, que manifestou que as súas declaracións foran terxiversadas, acusou ao Partido Socialista de xerar “noticias falsas” sobre este tema e, por esta razón, volveu remarcar a aposta do seu partido pola suba das pensións de xubilación que, segundo recalcou, “non están en perigo”.

Ademais, cualificou como un anuncio de “recorte” das pensións de viuvez a proposta do secretario de Estado de Seguridade Social, Octavio Selecto, para vinculalas á renda dos beneficiarios.