A representante do colectivo de pais e nais que, baixo a lema ‘Por un servizo pediátrico de calidade en Cangas’, esixe a cobertura da asistencia na localidade, Elisa Pidal, denunciou que o Concello de Cangas só conta cun pediatra dispoñible e achacou esta situación a que a Xunta non cubrise as baixas laborais dos demais profesionais.

Lembrou que o Centro de Saúde de Cangas contaba con dous pediatras na quenda de mañá e un de tarde. Con todo, sinalou que, debido a que as baixas laborais de dúas deles non foron cubertas, este mércores, o centro só contaba cun profesional, e que iso levou que algunhas familias se visen obrigadas a desprazarse ata o Hospital Álvaro Cunqueiro de Vigo para acceder a este servizo.

Elisa Pidal tamén recalcou que un dos profesionais está de baixa “desde hai un mes” e o outro desde hai “polo menos unha semana” e, con todo, segundo subliñou, a Consellería de Sanidade aínda non cubriu estas prazas. Ademais, remarcou que a Casa do Mar de Aldán, que dá cobertura ás parroquias de Aldán e O Hío, tamén conta cunha praza de Pediatría sen cubrir.

RESPOSTA DA XUNTA

pOLA SÚA BANDA Estrutura Organizativa de Xestión Integrada (EOXI) de Vigo asegurou que o Centro de Saúde de Cangas do Morrazo (Pontevedra) conta con dous pediatras e que as outras dúas prazas vacantes debido ás baixas laborais dos titulares non poden ser cubertas debido á falta de especialistas nas listas de contratación.

No entanto, a EOXI afirmou que a prestación do servizo de Pediatría está “garantida” debido a que o centro conta con dous especialistas desta rama sanitaria e con profesionais de Medicina Familiar e Comunitario.