Axentes da Policía Local de Vigo detiveron a un veciño da cidade, de 43 anos de idade, M.A.R.N., como presunto autor dunha tentativa de roubo con forza nun establecemento no que traballara como cociñeiro.

Segundo informaron fontes policiais os feitos ocorreron na madrugada deste venres, cando dúas testemuñas sorprenderon ao sospeitoso tentando entrar no local. Así, estes cidadáns circulaban en coche pola estrada de Camposancos, cando se decataron de que había unha persoa tentando entrar nese establecemento, e que tiña xa medio corpo metido nunha xanela.

Por iso, interceptárono e comezaron a forcexear con el, momento no que pasou unha patrulla da Policía Local, e comprobou que a xanela tiña signos de ser forzada, así como o enreixado de apertura principal. Os axentes viron unha cadeira colocada preto da xanela pola que quería entrar o sospeitoso, así como un garfo parrilleiro trinchante co que, supostamente, forzou dita xanela.

Alertada pola Policía, presentouse no lugar a propietaria do establecemento, quen confirmou que coñecía ao sospeitoso porque traballara alí como cociñeiro. Segundo explicou aos axentes, tiveran un problema laboral e rescindiulle o contrato o pasado mércores. A muller tamén confirmou que M.A.R.N. non ten permiso para acceder ao local fóra do horario de apertura, e que tampouco dispón de chaves do mesmo.