O Xulgado de Primeira Instancia número 5 de Vigo, especializado en Familia, ordenou o ingreso nunha residencia xeriátrica de José Antonio V.V., un octoxenario coñecido na cidade como o ‘raiacoches’ polos reiterados episodios de danos en vehículos e fechaduras que protagonizou nos barrios do Calvario e A Dobrada.

O home permanecía ingresado no Hospital Álvaro Cunqueiro da cidade olívica desde o pasado 8 de febreiro, cando outro xulgado de Familia de Vigo acordou o seu traslado ao centro médico despois de ser detido.

Naquel momento, estaba pendente dun proceso penal, e a Fiscalía pedira o internamento psiquiátrico “non voluntario e urxente” do home, co fin de levar a cabo “un diagnóstico completo do seu estado e, en particular da súa saúde psíquica”.

Ademais, o Ministerio Público pedira que os servizos sociais avaliasen a posible situación de vulnerabilidade deste octoxenario e a súa capacidade para vivir só e atender ás súas necesidades. Agora o Xulgado de Primeira Instancia número 5 determinou o seu ingreso nunha residencia.

Este ancián tiña, segundo apuntou a Policía, “atemorizada” á veciñanza e os seus actos vandálicos traducíronse en danos por centos de coches e fechaduras.