A Sección Segunda da Audiencia Provincial de Pontevedra condenou a un mozo a seis anos de prisión por un delito de agresión sexual e outro leve de lesións. O acusado, coas iniciais A.S.M., recoñeceu que violou á súa vítima no exterior dunha discoteca de Tui e aceptou a condena despois de chegar as partes a un acordo de conformidade que evitou a celebración da vista oral.

A Fiscalía solicitaba inicialmente unha pena de 14 anos de prisión que reduciu a seis anos de cárcere e outro dez anos de afastamento así como unha multa polo delito de lesións. O representante do Ministerio Público tamén retirou unha circunstancia agravante de abuso de superioridade por ascendencia.

Os feitos, que agora se declaran probados, tiveron lugar na madrugada do 4 de decembro de 2016.

Segundo consta no escrito de acusación da Fiscalía, aproveitando que a moza “estaba baixo a influencia do alcol” e algo “mareada”, o acusado suxeitou dun brazo á moza e tirou dela ata levala a un caleixón próximo a unha discoteca onde a empuxou tirándoa ao chan e aproveitándose do seu estado e da súa “curta idade”, rompeulle a roupa, tapoulle a boca e violouna.

A muller sufriu lesións en diversas partes do corpo. O acusado xa ten prohibido achegarse a menos de 500 metros á nova, ao seu domicilio, centro de estudos ou a calquera outro lugar no que se atope e comunicarse con ela por calquera medio. A sentenza é firme e contra ela non cabe recurso.