O alcalde de Vigo, Abel Caballero, insistiu de novo na necesidade de que a Xunta transfira ao Concello olívico a titularidade da conca do río Lagares. Tras ser preguntado respecto diso nunha rolda de prensa, Caballero acusou á Administración autonómica de non realizar os labores de limpeza da contorna o que, ao seu xuízo, sumado ás choivas, pode provocar inundacións na zona.

Por iso, sinalou a importancia de que sexa o ente local o que xestione o tratamento da zona e, neste sentido, apostou por continuar co desenvolvemento do acondicionamento. Ademais, indicou que o tramo do paseo do río que discorrerá desde Cabral ata Samil atópase en proceso de expropiación.

Por outra banda, informou de que, desde este luns e ata o próximo 18 de marzo, estará exposto no Concello o censo electoral co fin de que as persoas poidan comprobar o correcto rexistro no mesmo. O horario de apertura será de 9,30 a 13,30 horas e de 16,00 a 18,00 horas, aínda que tamén se poderá consultar a través da páxina web co Documento Nacional de Identidade.

O alcalde lembrou que o colectivo que forma parte do censo electoral supera as 238.000 persoas, das que máis de 3.300 serán seleccionadas para formar parte das mesas de votación.