A Autoridade Portuaria de Vigo iniciará a próxima semana os labores de inspección para analizar as causas do derrube ocorrido o pasado mes de agosto durante a celebración do festival O Marisquiño, que se saldou con máis de 460 feridos.

A través dun comunicado, o Porto detallou que os labores de inspección e extracción de testemuñas se enmarcan no parte da pericial encargada por esta entidade, e concretou que as mesmas darán comezo o vindeiro luns.

Así mesmo, incidiu en que o convenio ‘Abrir Vigo ao Mar’, subscrito o 2 de novembro de 1992, prevía na súa cláusula V a obrigación do Concello de Vigo de manter “toda a actuación en perfecto estado de conservación”. Neste sentido, a Autoridade Portuaria entendeu, por tanto, que o acordo “se refire ao mantemento da ‘actuación’ en toda a súa extensión ou partes integrantes”.

En relación ás declaracións do alcalde, Abel Caballero, que insistiu na concesión da autorización por parte do Porto para que se celebrase o evento, a Autoridade Portuaria incidiu en que “o permiso de ocupación non é a autorización”. Tamén sinalou que é “necesaria” a licenza municipal ou autonómica para a celebración de espectáculos públicos de carácter extraordinario “sempre que requiran de plan de autoprotección, como é este caso”.