A agrupación de Ciudadanos en Vigo instou ao alcalde, Abel Caballero, a investigar se existen casos similares ao do ‘enchufe’ da cuñada da presidenta da Deputación, Carmela Silva, no Concello e demandou “que non tente bloquear” investigacións relativas a este tipo de situacións.

Nun comunicado, a formación laranxa defendeu que Abel Caballero debe dar “explicacións públicas a todos os vigueses” e sinalou a necesidade de establecer novos mecanismos de control para evitar que se produzan casos similares no futuro.

A este respecto, afirmou que este tipo de situacións provocan que os cidadáns “sentan afastados das institucións”. Por esta razón, apostaron por que o goberno local leve a cabo “políticas de prevención” co fin de loitar contra estas prácticas xa que, o contrario, sería, ao seu xuízo, “inadmisible”.

En concreto, a Audiencia Provincial de Pontevedra condenou a Francisco Javier G.O. a 5 anos de prisión e 9 de inhabilitación por colaborar co xerente dunha concesionaria municipal (tamén condenado) co fin de adxudicar a elaboración de enquisas a unha empresa e, deste xeito, pagar un soldo a unha cuñada de Carmela Silva, que, segundo a sentenza, non chegou a elaborar estes informes.