Coppelia (Pi i Margall, 61) é un conservatorio de música e danza ubicado no centro da nosa cidade. Algúns dos seus alumnos tardarán un pouquiño máis en durmir estes días, posto que o venres 1 de febreiro teñen unha gran cita.

Así, participarán ás oito e media na representación de “El Cascanueces” do Ballet Imperial Ruso, ante un Teatro Afundación cheo. Un gran orgullo para elas e tamén para o seu profesor, o bailarín Rubén Ventoso.

O bailarín e coreógrafo vigués Rubén Ventoso é o encargado de formar e dirixir a este gran equipo.

Son en total 32 nenos e nenas de entre seis e catorce anos. Intentarán superar os nervios pese á súa xuventude, e de seguro que o conseguirán.

Desde o día 1, compartirán ensaios e actuación con bailaríns profesionais. Ábrese para eles a porta deste fermoso pero sacrificado mundo.

O conservatorio Coppelia ofrece ensinanza oficial e non oficial desde os tres anos, en disciplinas tan variadas como o piano, canto, guitarra, gaita…

Pero, durante estes días, elas serán as grandes protagonistas.

‘El Cascanueces’, ballet en dous actos, foi estrenado o 17 de decembro de 1892 en San Petesburgo. A música, do lendario Tchaikovsky.

A historia está baseada nun libro de contos de Ernst Theodor Amadeus Hoffman, ou máis ben nunha adaptación deste realizada por Alejandro Dumas.

Retornando ao alumnado do conservatorio Coppelia, co seu esforzo e talento buscan estar á altura de tan mítica obra, un dous ballets máis afamados da historia.

Teñen un dos mellores mestres posibles: Ventoso traballou coa Compañía Nacional de Danza 2, baixo a dirección de Nacho Duato, así como no ballet Víctor Ullate.

Agora, xa non queda nada para a gran cita.