A Policía Local de Vigo detivo a F.B.G., home de 20 anos de idade, nacido e domiciliado en Vigo, por un suposto delito contra a seguridade viaria, tras evadir o alto policial con condución temeraria e por conducir baixo a influencia de bebidas alcohólicas.

Os feitos sucederon na madrugada do pasado sábado sobre as 00,50 horas cando unha patrulla que circulaba pola Praza de Compostela observou como o condutor dun turismo da marca Renault Clio circulaba a gran velocidade por esta praza en sentido Colón.

Así, no punto no que esta vía obriga a virar en dirección cara a rúa Reconquista, o vehículo continuou de fronte varios metros por dirección prohibida e, de xeito repentino, realizou unha manobra brusca de derrape coma se o condutor tirase do freo de man.

Acto seguido, segundo o relato policial, o condutor deu marcha atrás pola Praza de Compostela ata chocar co vehículo policial, que se atopaba na parte traseira e procedía a darlle o alto. No momento da identificación do condutor, os axentes verificaron que en dito turismo ían catro mozos, incluído o condutor, de idades comprendidas entre os 19 e 20 añosde idade.

A continuación realizáronlle a proba preceptiva de determinación do grao de impregnación alcohólica ao condutor, que deu un resultado positivo de 0,71 mg/l de alcol por litro de aire expirado en ambas as probas.

Finalmente, os policías procederon á medición da pegada de freada ocasionada na vía pública polo Renault Clio, que alcanzou unha lonxitude de 17,4 metros. E por todo iso procederon á detención do condutor.

OUTRA DETENCIÓN

A Policía Local tamén detivo R.A.D.M., home de 29 anos de idade, nacido en Chile e domiciliado en Vigo, porque sobre el pesaba unha orde de busca e detención do Xulgado do Penal número 7 de Bilbao.

A detención produciuse ás 13,00 horas do pasado sábado, cando uns policías que se atopaban realizando funcións de prevención pola rúa Celso Emilio Ferreiro, procederon a identificar ao agora detido.

Consultados os servizos informáticos da Dirección Xeral de Policía, comprobaron que sobre o pesaba esa orde por un suposto delito contra a seguridade do tráfico, polo que procederon á súa detención.