O Servizo Galego de Saúde (Sergas) confirmou que a área sanitaria de Vigo activou o pasado luns o Plan de Continxencia deseñado para facer fronte á gripe despois de que a dirección xeral de Saúde Pública explicase que a evolución epidemiolóxica deste virus superara o “limiar de intensidade de actividade gripe basal”. Actualmente diagnostícanse 10 casos de gripe diarios.

Este plan establece a coordinación dos servizos e recursos de atención primaria e hospitalaria para “optimizar” a atención á gripe e as súas complicacións, tal e como recordou a EOXI de Vigo este xoves.

O Sergas reforzou o servizo de Urxencias cun equipo máis, composto por persoal médico, de enfermería, TCAE e un celador ou celadora.

Así mesmo, instaurouse a figura dunha “enfermeira de enlace” entre as urxencias e os servizos hospitalarios “co obxectivo de coordinar e axilizar todos os trámites organizativos derivados da atención urxente, como os ingresos en planta ou os traslados en ambulancias intercentros.

Por outra banda, a xerencia de Vigo abriu 75 camas no Hospital Meixoeiro e duplicou 29 habitacións do Hospital Álvaro Cunqueiro.

A ampliación destes recursos, segundo trasladou o Sergas, vai acompañada da contratación de persoal de reforzo para a atención.

A directora de Procesos Asistencias, Mar Vázquez, manifestou este xoves que a área sanitaria de Vigo está “preparada e vixiante” ante a epidemia de gripe e que se estableceu un “sistema de control” e de “motorización permanente” cos servizos de Microbiología e Medicamento Preventivo para coñecer diariamente os ingresos con diagnóstico de gripe.

Mar Vázquez tamén sostivo que se constituíu un comité no que están representados os servizos con implicación nesta patoloxía, que permite “adoptar decisións rápidas e acordadas en caso de necesidade”.

Polo momento, como avanzou o Sergas, están a diagnosticarse 10 casos diarios de gripe, do virus H3N2 (tipo A), pero con escasa incidencia na hospitalización.

A actividade en Urxencias experimentou un “lixeiro” repunte asistencial, segundo os datos facilitados pola EOXI, pois na primeira quincena de xaneiro atendéronse 5.686 urxencias en Vigo, 186 máis que o ano pasado, o que supón un incremento do 3,3 por cento.

O plan de continxencia previsto establece dous niveis de alerta. Alerta Amarela cando o número de pacientes pendentes de ingreso en Urxencias é superior a 15, ou a ocupación na área médica cirúrxica é superior ao 95 por cento; e Alerta Laranxa se hai máis de 25 pacientes esperando para ingresar, ou a ocupación é do cento por cento.