UGT-Galicia denunciou un ataque con un artefacto explosivo na sede que o sindicato ten na rúa García Barbón, na cidade de Vigo, e atribuíuno ao “clima de polarización e odio que están impoñendo algunhas organizacións, creando un terreo propicio perigoso”.

Nun comunicado, o sindicato explica que o ataque se produciu cando se estaba a celebrar a manifestación da tarde en Vigo, que saíu ás 18.00 horas da Praza de España e que foi convocada, de maneira unitaria, ademais de por organizacións sindicais de clase, polo Sindicato de Inquilinas, colectivos veciñais, ecoloxistas, feministas e estudantís.

Por iso, UGT advirte de que, se os feitos tivesen acontecido noutro momento, “aos danos materiais poderíase sumar algunha persoa ferida”. A explosión provocou un burato na porta de entrada da sede sindical, que é de cristal con reixas metálicas.A comisión executiva de UGT-Galicia lamenta este “peche” a unha xornada de folga que na Comunidade galega transcorrera con normalidade, sen incidentes de gran magnitude.

Así, o sindicato sostén que as manifestacións e o grao de apoio á folga son a expresión do “malestar pola forma en que están a evolucionar os salarios, os problemas para acceder a unha vivenda e a suba continua dos prezos”.

POLARIZACIÓN

“Pero parece que algúns, despois de máis de 51 anos de democracia, non aceptan as regras polas que nos dotamos ou pretenden regresar a un pasado que quixeramos non ter que volver repetir”, expresa o comunicado de UGT, que cre que o ataque á súa sede en Vigo é “froito da polarización que está a vivir esta sociedade”.

A este respecto, sinala “certas organizacións” que traballan “ao ditado do odio e creando un terreo propicio perigoso“. “Non todo vale”, advirte o sindicato, que engade que as vindeiras eleccións do 29 de novembro “non deberían converter esta sociedade nun lodazal de leas no que os seus actores esquezan as regras de convivencia”.