O BNG de Vigo mostrou este mércores a súa oposición á subida do 5,5% dos salarios dos cargos electos que propón o goberno de Abel Caballero nos orzamentos municipais de 2027. Nun comunicado, o Bloque reclamou a conxelación das retribucións tanto do rexedor como dos concelleiros con dedicación exclusiva ou parcial, criticando que no actual contexto de emerxencia social preténdase aumentar a distancia entre os salarios da corporación e os da maioría social.

“A política non pode ser tratada como unha profesión, nin como un modo de vida. É un espazo para a participación democrática e iso é incompatible con privilexios económicos”, reivindicou o portavoz nacionalista, Xabier Pérez Igrexas. Indicou que a actualización proposta elevaría o salario anual de Caballero ata os 82.500 euros, mentres que os concelleiros con dedicación exclusiva chegarían a 71.000 euros.

“Non ten xustificación retribucións que son máis de catro veces o salario mínimo e que se sitúan por encima das categorías máis altas do persoal público”, insistiu Igrexas. A pesar de subliñar que o exercicio da representación institucional debe contar con condicións económicas “dignas”, para el isto non pode xustificar uns salarios que se afastan “enormemente” das condicións económicas da maioría da poboación. “Unha cousa é garantir retribucións dignas e outra é fixarse salarios estratosféricos nunha cidade na que preto dunha de cada tres persoas traballadoras están por baixo do salario mínimo”, sentenciou.