A muller do responsable do club de golf Ría de Vigo, acusado de varios delitos contra a Facenda Pública, negou que tivesen un entramado de sociedades “pantalla” para eludir pagamentos fiscais ou que recibisen ingresos non declarados.

Así o expuxo na súa declaración como testemuña, no xuízo que se segue contra o seu marido, Cholmin K.K., para quen a Fiscalía pide penas que suman 10 anos de prisión por fraude fiscal, e que se celebra na quinta sección da Audiencia Provincial de Pontevedra, con sede en Vigo.Na sesión deste luns, ademais das cuestións previas, declararon os testemuños propostos pola defensa, co fin de demostrar que o acusado non só non se beneficiou de ingresos ilícitos, senón que destinaba os ingresos que percibía a pagar débedas.

Nese sentido, tanto un dos traballadores do club de golf coma a esposa do acusado recoñeceron que a empresa que xestionaba as instalacións pasou por dificultades económicas, o que levou a pagar as nóminas con atraso e a acumular débedas.

A muller de Cholmin rexeitou, en todo caso, que fixesen uso de sociedades pantalla para recibir cartos e non declaralos, e asegurou que, cando a empresa recibía ingresos doutras sociedades, o diñeiro se destinaba de inmediato a saldar eses pagamentos pendentes. Ademais, precisou que os exercicios fiscais que están baixo a lupa neste procedemento foron os de 2016, 2017 e 2019, cando eles aínda non estaban casados.

Segundo o escrito de acusación da Fiscalía, ese empresario defraudou a Facenda case 1,4 millóns de euros nos exercicios de 2016, 2017 e 2019. De feito, neses períodos presentou liquidacións de IRPF con resultado negativo, de maneira que Facenda lle devolveu case 5.000 euros.

Porén, nese tempo, sostén o ministerio público, o acusado obtivo outros ingresos que non declarou, a través doutras sociedades con sede en Panamá. Entre 2017 e 2019 cobrou máis de 2 millóns de euros desas sociedades. Así mesmo, recibiu outras cantidades dunha sociedade con sede en Angola, de contas bancarias de Corea e de rendementos de traballo nos Países Baixos e en Corea, en total, máis de 300.000 euros. Igualmente, obtivo outros ingresos “non xustificados” en contas de Corea, dos Países Baixos e de España (máis de 425.000 euros) e tamén “ocultou” rendementos de capital mobiliario por case 40.000 euros.

Por iso, a Fiscalía considérao autor de tres delitos contra a Facenda Pública e pide que se lle impoñan un total de 10 anos de prisión, así como multas que suman 3 millóns de euros.  O xuízo continuará nas sesións deste martes e mércores, con declaracións de máis testemuñas e de peritos, ademais da declaración do propio acusado, que falará ao final.