SOS Sanidade Pública anunciou que volverá manifestarse en Vigo o vindeiro mércores, día 4 de novembro, para reclamar a “reconstrución” da Área Sanitaria: “É posible ter outra sanidade pública. Non é unha utopía”. Así o sinalou o voceiro de SOS Sanidade Pública na Área Sanitaria de Vigo, Manuel González Moreira, quen lamentou a situación na que se atopa a sanidade na cidade, cun hospital privado que atende a 100.000 persoas, segundo indicou, e outro centro hospitalario, o Álvaro Cunqueiro, no que se está “de alugueiro”.

Para el, é “fundamental” reconstruír a Área Sanitaria para que o 100 % da cidadanía estea cuberta por centros públicos, ademais de facela máis atractiva para os profesionais, xa que “cada vez é máis difícil que queiran traballar en Vigo polas condicións ás que están sometidos”.

Por iso, animou os vigueses a saír á rúa e mobilizarse, porque con “decisións políticas” é posible cambiar esta situación. Preguntado polo proxecto de orzamentos da Xunta de Galicia, afirmou que “non recollen” a “sobrefinanciación” que precisa a Área de Vigo para a súa “reconstrución”, nin un plan específico para a cidade. A Plataforma estivo acompañada por representantes do BNG de Vigo, encabezados polo seu voceiro, Xabier Pérez Igrexas, e de Frente Amplio, coa voceira de Sumar no Congreso e candidata de Frente Amplio, Verónica Martínez Barbero.

Precisamente ela criticou que o PP levou a sanidade “a converterse nunha sanidade practicamente privada”. “Non temos un hospital público. Temos unhas listas de espera longuísimas”, insistiu, criticando que os ‘populares’ pretendan que a cidadanía dependa de seguros privados, segundo sinalou. “Hai un obxectivo de fondo (…) que é que teñamos que acudir a sistemas privados”, subliñou, reclamando máis investimento na sanidade pública.