A Cooperativa de Armadores de Pesca do Porto de Vigo (ARVI) considera “absolutamente insuficientes” as axudas para o sector pesqueiro pola crise de Oriente Medio, despois de se coñecer que o Goberno prorrogará as medidas ata o 31 de decembro. A xuízo dos armadores, isto “non permitirá compensar en ningún sentido” a “grave” situación da pesca española, que sofre un “grave impacto” polo elevado prezo dos combustibles.

“Desde o inicio da crise, o seu custo máis que se duplicou, mentres que o actual mecanismo de axudas presenta importantes deficiencias que limitan gravemente e desvirtúan a súa eficacia”, criticou ARVI. Por todo iso, ARVI ve “imprescindible” que a axuda ao combustible se vincule ao consumo e non a estimacións. Tamén solicita que se revise o prezo de activación de 0,70 euros por litro, por ser superior ao prezo previo á crise e á media de 2025, que asegura que era de 0,555 euros/litro, entre outras medidas.

ARVI considera igualmente necesario avanzar na prórroga destas medidas a nivel comunitario e na implantación do Rexistro Especial para os buques de altura e gran altura que traballan fóra da ZEE española, como instrumento que podería contribuír a mellorar a competitividade e a capacidade de resposta destas empresas ante a actual crise.