Un mariñeiro tivo que ser trasladado a Vigo en helicóptero na noite deste pasado martes tras resultar ferido grave mentres faenaba a 100 millas de Cabo Vilán. Segundo informa Gardacostas de Galicia na súa conta oficial de ‘X'(antigo Twitter), o home traballaba no pesqueiro ‘Armaven Un’ e foi trasladado á cidade olívica no helicóptero Pesca 1 en coordinación con Salvamento Marítimo.

Fontes do 112 Galicia consultadas por Europa Press indicaron que todo ocorreu sobre as 19.00 horas, cando Gardacostas solicitou a mobilización da Pesca 1 para o rescate. Finalmente, Gardacostas asegurou que foron necesarias tres horas e media de voo ata chegar a terra, con vento de 30 nós e ondas de 4 metros no mar.

O ferido foi trasladado ao aeroporto de Vigo, desde onde continuou o traxecto en ambulancia ata o hospital Álvaro Cunqueiro.