O delegado do Goberno en Galicia, Javier Losada, afirmou que se segue investigando” o crime do octoxenario de Vigo, que desaparecera o pasado 26 de decembro e cuxo cadáver apareceu o luns cos pés atados e unha bolsa na cabeza, e tapado cuns plásticos moi preto de onde vivía, no barrio de San Pedro de Sárdoma.

Losada, nun acto en Lugo, recordou que “os primeiros indicios establecen que hai unha cuestión de violencia, porque apareceron datos de violencia”, pero avisou de que “segue aínda a investigación”.

Interpelado sobre si se investiga á “contorna” do ancián, o delegado sinalou que “cando se abre unha investigación investígase todo”. “Estamos nunha fase de investigación inicial, fai 48 horas que apareceu o corpo desta persoa, e a policía xudicial está a facer todo isto. Vaime a permitir unha certa cautela”, resolveu.