A Policía Nacional de Vigo investiga a morte dun octoxenario veciño da cidade cuxo cadáver apareceu na tarde deste luns tapado “cuns plásticos”, segundo confirmaron a Europa Press fontes da Subdelegación do Goberno en Pontevedra.

O falecido é un veciño do barrio de Sárdoma, Manuel A.R., de 81 anos de idade, e sobre o cal constaba unha orde de desaparición que se cursou durante o pasado Nadal e que xa investigaban axentes da Policía Nacional.

O corpo apareceu nas proximidades do río Lagares ao seu paso polo barrio vigués de Sárdoma, nunha zona entre naves industriais. Foi un veciño da zona o que deu a alerta á Policía Nacional sobre as 15:30 horas do pasado luns. O cadáver presentaba signos de morte por violencia e atopábase envolto nuns plásticos e, segundo trasladaron fontes da Policía Nacional, estaba moi camuflado coa contorna.

A sala do 091 de Vigo puxo estes feitos en coñecemento do xulgado de garda de Vigo, o de Instrución número 8, á Policía científica e a funcionarios da Policía xudicial especializados neste tipo de incidentes.

Segundo explicaron fontes policiais, unha vez inspeccionada a zona e solicitadas as posibles probas trasladouse o cadáver ao Nicolás Pena para que o equipo forense realizase a autopsia.

Para non prexudicar as diferentes liñas de investigación que se seguen neste caso, a Policía manifestou que non facilitará información sobre a investigación en curso nin sobre o xeito na que foi segada a vida deste vigués.

DENUNCIA DE DESAPARICIÓN

O pasado día 5 de xaneiro a familia deste vigués presentara unha denuncia ante a Policía Nacional pola súa desaparición pois “notaban a súa ausencia en días anteriores”. O falecido vivía só e adoitaba dar paseos pola zona, segundo indicaron os seus familiares ao acudir ás dependencias policiais.

A familia, segundo explicaron fontes policiais, intentara comunicarse con el por vía telefónica e pensaba que podía atoparse noutra vivenda da súa propiedade, na zona da Cañiza. Realizadas todas as comprobacións, a familia optou por pór unha denuncia de desaparición.

O pasado domingo os efectivos policiais fixeron unha primeira procura deste octoxenario pola zona próxima á súa casa en Sárdoma, pois a familia comentara ao pór a denuncia que ultimamente se atopaba algo máis desorientado que de costume”.

A Policía trasladou que o pasado luns, cando apareceu o cadáver tras o aviso dun veciño, sobrevoouse a zona para tratar de localizalo durante máis dunha hora sen resultados positivos.