Un traballador de 59 anos de idade, J.A.C.A., resultou ferido este luns en Vigo tras sufrir unha caída desde uns 8 metros de altura cando estaba a traballar nun estaleiro da Avenida de Beiramar. Segundo informaron fontes do 112 Galicia e do 061, o aviso foi recibido sobre as 8.15 horas, e o alertante informaba dun traballador ferido tras precipitarse desde un barco no estaleiro Freire.

Os servizos de Emerxencias informaron a Urxencias Sanitarias-061, que trasladou ao estaleiro unha UVI móbil. Tras atender ao operario no lugar do sinistro, trasladárono na ambulancia ao Hospital Álvaro Cunqueiro de Vigo.