A Xunta de Galicia aclarou este mércores que “non hai risco de escaseza” de auga en Vigo, e lamentou que o alcalde, Abel Caballero, que anunciou nas últimas horas unha “situación de prealerta”, utiliza o “medo” con fins políticos.

A Consellería de Medio Ambiente e Cambio Climático sinalou que as choivas foron escasas desde o pasado marzo, o que sumado ao feito de que as temperaturas foi máis elevadas do habitual, provocou que os encoros da demarcación Galicia-Costa teñan unha ocupación do 86,52%, nove puntos por baixo da media dos últimos anos, e é previsible que as reservas sigan baixando.

Esta situación “é algo máis intensa” no subsistema do río Anllóns e do río Lérez, ademais da situación de Baiona. En total, son 32 os municipios afectados, nos que se decretou a prealerta.

Con todo, matizaron fontes da Consellería, en municipios como Vigo e a súa contorna “non hai risco de escaseza”, xa que as reservas do encoro de Eiras están ao 87% e, aínda que están por baixo do nivel doutros anos, “superan as previsións de necesidades a medio prazo”. Ademais, a Xunta trasladou que a operación de abastecemento está “garantida” tras a intervención autonómica para cambiar as válvulas da presa.

“Despois de anos de incumprimentos da eficiencia na rede de tubaxes, e cunha potabilizadora que non podía traballar cando o encoro baixaba dun volume, e tras reiteradas advertencias autonómicas ao Concello, hoxe en día os consumos desde Eiras son estables”, sinalaron as mesmas fontes.

Finalmente, Augas de Galicia apuntou que, aínda que o consumo responsable é unha boa directriz, o alcalde “non debe meter medo á xente só para reforzar os seus argumentos políticos”. Así mesmo, con respecto á solicitude para usar auga depurada ou reciclada, a Consellería advertiu de que ese emprego é “viable”, pero “debe cumprir con todas as garantías sanitarias para ser validado”.