Un condutor resultou ferido este martes tras envorcar o camión no que circulaba polo interior do porto comercial de colectores de Vigo. Segundo trasladou o 112 Galicia, o sinistro produciuse ás 08.30 horas. O vehículo envorcou polo lado do condutor, polo que non lograba saír do habitáculo e foi necesaria a intervención dos bombeiros da cidade.

Posteriormente, o ferido foi inmobilizado e trasladado en padiola ata unha ambulancia para ser evacuado ao centro hospitalario de referencia. Foi o Servizo de Urxencias Sanitarias de Galicia-061 quen deu aviso á central de emerxencias, que mobilizou ata o lugar aos bombeiros e informou á Policía Local e á Garda Civil de Tráfico.