Unha persecución policial polo centro de Vigo rematou na mañá deste venres coa detención dun condutor que circulaba sen carné e con dous axentes da Policía Local feridos de carácter leve, tras embestir frontalmente contra un coche patrulla ao verse sen saída.

Segundo fontes da Policía Local consultadas por Europa Press, os feitos comezaron arredor das 11.35 horas na rúa Martínez Garrido, onde unha patrulla tratou de dar o alto a un vehículo despois de que o sistema alertase de varias “incidencias” relacionadas co coche.

Ao achegarse ao vehículo, os axentes recoñeceron o condutor como un vello coñecido policial, con antecedentes por diferentes delitos contra a seguridade viaria. Malia os intentos dos policías por interceptalo, o home non se detivo e continuou a marcha, o que deu lugar a unha persecución por distintas rúas da cidade.

Durante a fuxida, o vehículo chegou a circular a máis de 120 quilómetros por hora, segundo indicaron as mesmas fontes, nun episodio que obrigou á Policía Local a despregar un dispositivo para tratar de localizalo e deter a súa marcha.

LOCALIZADO GRAZAS Á COLABORACIÓN CIDADÁ

A colaboración cidadá foi clave para que os axentes conseguisen localizar o coche nunha urbanización situada nas proximidades da Madroa. Nese punto, ao quedar acurralado e sen posibilidade de escapatoria, o condutor dirixiu o seu vehículo contra unha patrulla que o seguía e impactou frontalmente contra ela.

Como consecuencia da colisión, dous axentes resultaron feridos leves. O home foi finalmente detido pola Policía Local.

As fontes consultadas sinalaron tamén que o arrestado non tiña carné de conducir, polo que os feitos se enmarcan nun novo episodio relacionado coa seguridade viaria na cidade.