A Policía Local de Vigo interceptou este venres ao condutor dun turismo de 46 anos que triplicaba a taxa de alcoholemia permitida, polo que se tramitaron dilixencias en calidade de investigado por un delito contra a seguridade viaria por conducir baixo a influencia de bebidas alcohólicas.

Así o informou a Policía Local de Vigo, que relatou que sobre as 1:00 horas deste venres axentes municipais interceptaron ao condutor dun turismo durante un control preventivo de vehículos na Avenida Atlántida e, no momento da identificación, comprobaron que presentaba “claros síntomas de atoparse baixo os efectos do consumo de bebidas alcohólicas”.

Tras realizarlle a proba de determinación do grao de impregnación alcohólica, o condutor obtivo un resultado positivo de 0,75 miligramos de alcol por litro de aire expirado na primeira proba e 0,71 mg/l na segunda.

O home, de 46 anos e que conducía un turismo da marca Peugeot 207, foi obxecto de dilixencias xudiciais en calidade de investigado por un suposto delito contra a seguridade viaria ao superar o limite penal establecido.