A Cabalgata de Reyes de Vigo repartirá este sábado 5 de xaneiro un total de 4,5 toneladas de caramelos nun desfile no que participarán 1.250 persoas e que incluirá 15 carrozas, tres autobuses e outras atraccións como espectáculos de maxia e de circo. En palabras do alcalde, Abel Caballero, será “a mellor” Cabalgata de España” e “do mundo”.
“A mellor, a gran distancia da seguinte, que non se cal será a segunda. A mellor vai ser a nosa e claro, ser a mellor de España é ser a mellor do mundo”, reivindicou este mércores, en declaracións aos medios tras visitar as carrozas que participarán na comitiva.
Neste contexto, invitou “a todas as nenas, todos os nenos, a todos os papás, mamás, avós e avoas, tíos e tías” tanto de Vigo como “de toda España” a visitar a urbe este sábado, como xa o fan, segundo as súas cifras, “miles e miles e miles” de cidadáns durante as datas do Nadal.
Así mesmo, o rexedor chanceou con que “xa asinou o decreto de bo tempo” para o día 5, que garantirá unha “boa temperatura”, entre os 12 e 14 graos, para as 18,00 da tarde.
“Eu dixen que non ía chover no aceso e cumprino. Agora, para que todas as nenas e nenos, mamás e papás, avoas e avós, tías e tíos o saiban, ese día vai ser un día dunha meteoroloxía estupenda. Haberá un sol magnífico,haberá a luz de Vigo, a cor de Vigo, a alegría de Vigo e a mellor Cabalgata do mundo”, anunciou Caballero.
DESFILE DESDE As 18:00 HORAS
O desfile sairá ás 18,00 horas desde a rotonda de Isaac Peral, para despois percorrer García Barbón e Policarpo Sanz ata a Porta do Sol, onde ss súas Maxestades serán recibidas ás 20:00 horas polo mesmo alcalde, quen lles entregará a chave da cidade.
A comitiva estará composta por 15 carrozas, tres autobuses e diferentes atraccións como espectáculos de ‘clown’, circo, teatro e maxia que acompañarán aos vehículos. O desfile abrirano as motos da Policía Local e os cabalos deste corpo de seguridade, que vestirán “de gala”, tal e como explicou Caballero.
Ademais, as carrozas terán diferentes temáticas como os clásicos cinematográficos ‘Mary Poppins’ e ‘Peter Pan’, e estarán amenizadas pola música tradicional de agrupacións locais. As persoas participantes lanzarán 4.500 quilos de caramelos “pequeniños”, segundo palabras do alcalde, que serán “sen gluten e sen azucre”.
Todo o percorrido estará “completamente valado”, segundo garantiu o alcalde, e a Cabalgata disporá dun dispositivo de seguridade “moi ben estudado e moi forte”, con 90 axentes locais e 300 voluntarios de Protección Civil e Cruz Vermella. Así mesmo, poranse a disposición catro postos de urxencia e dous lugares para nenos extraviados.
