Axentes da Policía Local de Vigo detiveron a unha muller de 23 anos de idade, M.G.L., tras tentar atracar unha cafetaría da cidade, armada cun coitelo, e tras causar lesións a dous clientes do establecemento. Segundo informaron fontes policiais, os feitos ocorreron sobre as 19:30 horas deste martes, nun local da rúa Isaac Peral. O 092 recibiu un aviso sobre unha agresión con arma branca por parte dunha muller no interior do bar.
Varias patrullas trasladáronse á zona e falaron coas testemuñas, que relataron que unha muller entrara no local exhibindo un coitelo e dirixíndose ao camareiro, mentres lle esixía o diñeiro da caixa. O empregado saltou a barra e foi perseguido pola nova, que arremeteu contra el usando a arma branca. O camareiro logrou esquivala e dous clientes interviñeron na súa axuda, tratando de reducir á agresora. Esas dúas persoas resultaron feridas con cortes nun brazo e un dedo ao forcexar coa muller, pero lograron que tirase o coitelo ao chan e que marchase.
Os axentes de Policía fixeron unha batida pola zona e localizaron á sospeitosa na rúa Areal, tratando de esconderse no interior dun edificio. Ao ser identificada, a moza mostrouse moi nerviosa, tirou as súas pertenzas ao chan e tratou de fuxir, pero foi detida e reducida, xa que mostrou gran resistencia ante a intervención policial.
