Gardacostas de Galicia, no helicóptero Pesca 1, rescatou este mércores a seis persoas que se atopaban a bordo dun veleiro a 155 millas de Vigo, unha operación que cualificaron de “límite” pola longa distancia. En concreto, tratábase dunha embarcación de bandeira estoniana á que tiveron que auxiliar “con ventos sur de 30 nós e ao límite de combustible“, xa que se atopaba cunha vía de auga e sen motor.

A actuación levou a cabo tras recibir aviso do Centro Coordinador de Salvamento Marítimo de Fisterra ás 9:30 horas. A pesar das dificultades iniciais de comunicación, utilizouse tamén o sistema Starlink con conexión satelitaria para contactar a través dunha persoa en terra en Estonia.

Os tripulantes, catro homes e dúas mulleres, informaron de que a vía de auga estaba controlada temporalmente, pero solicitaron a evacuación e activaron a radiobaliza de emerxencia tras quedar a mercé das condicións meteorolóxicas no mar.