A Xunta de Goberno Local do Concello de Vigo aprobou este venres o proxecto de ordenanza fiscal reguladora da recarga municipal sobre o Imposto Galego de Estancias Turísticas, coñecido como a taxa turística. Segundo explicou o alcalde, Abel Caballero, en declaracións remitidas aos medios, os prezos variarán desde os 0,80 ata os 2 euros por noite, en función do tipo de aloxamento. O documento establece que, para os hoteis de 5 estrelas (normais e superior) e os de 4 estrelas superior, a taxa será de 1,82 euros máis IVE (2 euros). Para o resto de hoteis de 4 estrelas e os de 3 estrelas, situarase en 1,46 euros máis IVE (1,60 euros). No caso do resto de hoteis e pensións, o importe será de 1,09 euros máis IVE (1,20 euros).
As vivendas de uso turístico terán un custo de 1,46 euros máis IVE (1,60 euros), mentres que para albergues, campamentos de turismo, establecementos de turismo rural, apartamentos e vivendas turísticas será de 0,73 euros máis IVE (0,80 euros). Igualmente, establécese unha taxa de 1,20 euros para as estancias en embarcacións de cruceiros turísticos. O Porto de Vigo mostrara o seu rexeitamento a este gravame para cruceiristas durante a consulta pública, aducindo efectos negativos, pero os informes do expediente sinalan que non haberá tal impacto e citan os exemplos de cidades como Lisboa, A Coruña, Barcelona ou Palma de Mallorca.
“RECARGA CERO” E EXENCIÓNS
En todo caso, a ordenanza contempla supostos de “recarga cero” e exencións. Así, desde a súa entrada en vigor, prevista para outubro deste ano, ata o 1 de xullo de 2027, haberá unha recarga cero para a terceira, cuarta e quinta pernoita e, a partir de entón, computarase un máximo de cinco noites por cada estancia. Igualmente, a taxa non se aplicará para os cruceiristas ata o verán de 2027. Por outra banda, non estarán suxeitas á taxa as estancias por motivos de saúde (incluídos acompañantes), de deportistas federados en competicións ou por causas de forza maior xestionadas polos servizos sociais.
Ademais, quedan exentos os menores de idade, persoas cunha discapacidade igual ou superior ao 65%, estancias subvencionadas por programas sociais, albergues públicos do Plan Xacobeo e albergues xuvenís. Unha vez aprobada na Xunta de Goberno, abrirase un prazo de 10 días para presentar emendas antes de pasar polas comisións informativas e o Pleno. O rexedor insistiu en que esta taxa se aplicará só ás persoas que visiten Vigo e que “non afectará para nada ás cidadás e cidadáns nin ás empresas” da cidade.
