O tribunal de instancia de Vigo, sección de Instrución, praza 4, decretou a posta en liberdade provisional das tres persoas detidas este xoves nun operativo antidroga levado a cabo na cidade pola Policía Nacional. Segundo informaron fontes xudiciais, “ninguén solicitou o seu ingreso en prisión”, polo que quedaron en liberdade, aínda que investigados por un suposto delito contra a saúde pública por tráfico de drogas. Así mesmo, o maxistrado acordou o comiso dos efectos intervidos, así como a clausura e tapiado da casa okupada da rúa Carballeira da Rabaneira, na zona da Florida, e que supostamente era o centro de distribución da droga.
DOUS REXISTROS SIMULTÁNEOS NA FLORIDA E EN CORUXO
O operativo policial desenvolveuse este xoves en dous puntos da cidade: esa casa okupada e un domicilio da parroquia de Coruxo. Os axentes investigaban desde había tempo unha persoa en Coruxo e as pescudas revelaron que era o principal provedor de droga doutras dúas persoas, que distribuían os estupefacientes desde a vivenda okupada.
A primeira hora da mañá, efectivos do Grupo Operativo Especial de Seguridade (GOES) da Xefatura Superior da Coruña e axentes da Unidade de Prevención e Reacción (UPR) da Comisaría de Vigo-Redondela procederon á entrada simultánea nos dous puntos. Na vivenda da Florida foron detidos os dous principais investigados e identificouse outras cinco persoas que estaban a pasar a noite na casa. En Coruxo foi arrestada unha terceira persoa, como suposto provedor da droga.
HEROÍNA, COCAÍNA, HAXIX, DIÑEIRO E VEHÍCULOS INTERVIDOS
Na primeira das localizacións interviñéronse 23 gramos de heroína —15 gramos xuntos e 8 en monodoses—, 250 gramos de cocaína, un puñal cunha folla de 20 centímetros, diversas básculas de precisión e útiles para o corte e distribución da droga. Ademais, foi incautado un vehículo que se utilizaba para ocultar a droga. Pola súa banda, no domicilio de Coruxo interviñéronse 200 gramos de haxix, un inhibidor de frecuencias, 2.300 euros en efectivo e dous vehículos usados para o transporte das substancias.
