Persoal científico e técnico do Instituto Español de Oceanografía (IEO, CSIC) levará a cabo durante o mes de abril dúas campañas de investigación oceanográfica destinadas á avaliación da sardiña e outras especies peláxicas de interese comercial nas augas do norte da Península Ibérica, desde a zona norte da costa portuguesa ata a fronteira con Francia. Ambas as campañas, denominadas Sareva e Pelacus, comezarán en Vigo a bordo dos buques oceanográficos Vizconde de Eza e Miguel Oliver, da Secretaría Xeral de Pesca. Estas supoñen un exercicio de cooperación coas autoridades de Portugal e Francia, “clave” para garantir unha xestión sustentable dos recursos pesqueiros, segundo subliña o IEO nun comunicado.
En concreto, a campaña Sareva 0426, que se realizará entre o 2 e o 30 de abril, forma parte dunha iniciativa coordinada con Portugal para estimar a biomasa reprodutora de sardiña (Sardina pilchardus) mediante o método de produción diaria de ovos (MPHD). Esta metodoloxía implica a estimación da produción total de ovos destas especies durante o seu período de posta, un parámetro que está relacionado coa biomasa do stock reprodutor, o que permite así obter unha estima do tamaño da poboación. A campaña divídese en dous partes: unha primeira que finalizará o 15 de abril e que abarcará as augas portuguesas, a costa galega, así como as rías de Vigo, Pontevedra, Arousa e Muros; e unha segunda parte que finalizará o 30 de abril e que abarcará o resto da zona de estudo, augas do Cantábrico ata augas francesas.
En paralelo á campaña Sareva, o IEO inicia a campaña Pelacus 0426, a bordo do buque oceanográfico Miguel Oliver e que se prolongará ata o 28 de abril. Esta recompilará información que permitirá caracterizar o ecosistema de especies peláxicas do norte da Península Ibérica, desde a zona das Rías Baixas ata a fronteira con Francia. Así, durante a campaña estimarase a biomasa das poboacións de sardiña, boquerón, xurelo, xarda e bacaladilla, entre outras especies. Ambas as campañas realizaranse na mesma época e área de mostraxe, complementándose mutuamente, segundo insistiu o IEO.
