O Tribunal Superior de Xustiza de Madrid (TSJM) deu á razón a un axente da Policía Nacional da Comisaría de Vigo, que cobraba menos do que lle correspondía polas funcións que exercía, segundo informou o sindicato Jupol. Así, a xustiza estimou integramente a demanda deste axente, recoñecendo que veu desempeñando funcións como Especialista de Automoción, a pesar de que a Dirección Xeral da Policía mantíñao catalogado nun posto inferior e, en consecuencia, percibindo unha retribución máis baixa.
A sentenza, xa firme ao non ser admitido recurso, obriga á Administración a recoñecer oficialmente o posto de traballo realmente desempeñado polo axente, así como a abonar todas as cantidades debidas polas diferenzas salariais correspondentes ao complemento específico, xeral, singular, de destino e produtividade, ademais dos intereses legais xerados polos importes non abonados. Así mesmo, sinala Jupol, o fallo xudicial ordena que este posto figure no expediente persoal do policía.
A resolución, ditada pola Sección Sétima da Sala do Contencioso-Administrativo do Tribunal Superior de Xustiza de Madrid, “non constitúe un caso illado”. Desde o sindicato destacan que esta sentenza “forma parte dunha sucesión continuada de resolucións favorables que están a recoñecer dereitos laborais e económicos a policías nacionais en toda España, grazas ao traballo dos servizos xurídicos do sindicato”. Jupol denuncia que “numerosos axentes levan anos desempeñando funcións de superior categoría sen o correspondente recoñecemento profesional nin salarial“, unha situación que cualifican de “inadmisible” en calquera ámbito laboral e especialmente grave cando provén da propia Administración do Estado.
