A Xunta, o Concello da Cañiza (Pontevedra) e a Zona Franca de Vigo asinaron o convenio de colaboración para a construción dun novo parque empresarial neste municipio. Dun lado, a conselleira de Economía e Industria, María Jesús Lorenzana, destacou o papel “crucial” da Xunta para a posta en marcha do futuro parque. Pola súa banda, o consorcio reivindica o “novo impulso” dun parque empresarial, o de O Vieiro na Cañiza, “que financiará e desenvolverá a Zona Franca de Vigo”.
Nun comunicado de prensa, a consellaría cualifica este proxecto como “unha mostra de colaboración administrativa” e asegura que permitirá dotar a unha zona “moi ben situada desde o punto de vista loxístico” de máis de 846.000 metros cadrados de chan industrial. “A Xunta de Galicia contribuíu modificando a lei de áreas empresariais de Galicia —a través da lei de medidas fiscais e administrativas que acompaña aos orzamentos deste ano— para facilitar que unha entidade do sector público estatal poida desenvolver unha área empresarial non prevista no plan sectorial unha vez sexa declarado o seu interese autonómico”, resalta a nota.
A sinatura produciuse entre Lorenzana, o alcalde da Cañiza, Luís Antonio Gómez Piña, e o delegado especial do Estado para o Consorcio Zona Franca de Vigo (CZFV), David Regades. O convenio recolle as bases para construír ese novo parque empresarial. As partes acordan iniciar a tramitación do Plan Estruturante de Ordenación de Chan Empresarial (Peose), a través de Economía e Industria, para desenvolver este parque que financiará o Consorcio Zona Franca de Vigo. Tanto o consistorio coma o consorcio teñen un prazo de dous anos para formalizar o acordo.
Noutro comunicado, Zona Franca de Vigo indica que o delegado do Estado no consorcio, David Regades, tamén puxo en valor “a coordinación institucional das tres administracións e a vontade de acelerar toda a tramitación”. Explica que o Peose é un instrumento que permite unha “ordenación máis áxil, facilita a creación de chan empresarial e acelera a súa tramitación” e precisa que o protocolo que se asinou é o paso previo á formalización dun convenio interadministrativo.
A nota de Zona Franca tamén recolle que o alcalde, Luís Piña, asegurou que “hoxe non só se asina un documento”, senón que “se reafirma o compromiso co futuro da Cañiza e o conxunto de Galicia”. O rexedor augura que este parque “solucionará a crecente demanda de chan empresarial no sur da provincia” e destaca que “é un proxecto para a Cañiza, para a Paradanta, para o Condado, para o Ribeiro, para o interior de Galicia, para a conexión co norte de Portugal e intégrase na dinámica da área de influencia de Vigo”.
“Trátase dunha actuación que conseguirá dinamizar a economía de todo o territorio, freará o despoboamento e xerará emprego, con estimacións de aproximadamente un milleiro de postos de traballo en sectores como a loxística, industria ou agroindustria”, afirmou.
