Quen lles ía dicir aos traballadores da zona azul de Vigo, en folga desde comezos de agosto tralo despedimento inxustificado de 7 compañeiros, que a súa loita continuaría ata o Nadal sen síntoma algún de chegar ao seu fin. De feito, recibiran a promesa de que en novembro o asunto estaría solucionado.

En calquera caso, visto o difícil da situación (están a piques de cumprir 4 meses sen soldo), e máis que demostrada a capacidade das luces viguesas de congregar multitudes, sumando a súa iconocidade á da propia campaña publicitaria do noso alcalde (aquel Very very welcome…); que mellor idea que pasar a Noiteboa baixo o teito de luces dunha das árbores de Nadal máis altas de Europa.

Así, moitos dos visitantes chegados de todas partes de Galicia e España sorprendéronse esta Noiteboa ao atopar fronte ao Sireno aos ex-traballadores de Dornier, que continúan coas mobilizacións e concentracións ata atopar unha solución. A xornada finalizou sen incidentes.