A Xunta de Galicia prevé que as obras de construción de vivendas e as de urbanización, que se desenvolverán paralelamente, no ámbito do Ofimático, en Vigo, poidan iniciarse entre 2028 e 2029, e confirmou que, ademais das 1.973 vivendas protexidas, haberá outras 35 vivendas unifamiliares libres para reacoller aos afectados polas expropiacións.

Así o detallou a conselleira de Vivenda e Planificación de Infraestruturas, María Martínez Allegue, que este xoves compareceu ante os medios para explicar o proxecto de desenvolvemento dese ámbito, que contará cun investimento autonómico de máis de 22 millóns de euros, e unha previsión de “investimento inducido” de 350 millóns.

Este ámbito desenvolverase no marco dun Proxecto de Interese Autonómico (PIA) que xa foi aprobado en Consello da Xunta e que leste mesmo xoves publícase no Diario Oficial de Galicia (DOG). Tras o prazo de presentación de alegacións, prevese que o PIA estea aprobado definitivamente no último trimestre deste ano.

Segundo os prazos manexados pola Consellería, ao longo de 2027 levará a cabo a licitación dos traballos de urbanización, en base a un deseño que este xoves se presentou ante os medios, e que inclúe, ademais das 2.008 vivendas, 550 prazas de aparcadoiro, viarios e máis de 160.000 metros cadrados de dotacións públicas (zonas verdes, carril bici, senllas peonís, espazo para unha residencia xuvenil, unha parcela destinada a usos comerciais, etc.).

María Martínez Allegue puxo en valor esta iniciativa do goberno galego para dar resposta á gran demanda de vivenda na cidade, e subliñou que a Xunta ten en Vigo “un traballo real” neste sentido, “aínda que algúns queiran negalo” e fronte a “anuncios estéticos”. Segundo sinalou, a previsión é que, entre 2029 e 2030 xa poidan instalarse veciños neste “novo barrio da cidade”.