A sección quinta da Audiencia Provincial de Pontevedra, con sede en Vigo, acolle desde este luns o xuízo contra 11 acusados dun presunto delito de contrabando de embarcacións prohibidas. Os procesados enfrontan penas que van desde os 2 aos 9 anos de prisión pola suposta construción e venda de lanchas semirrígidas de alta velocidade, coñecidas como ‘narcolanchas‘, desde Vigo e o norte de Portugal.

O xuízo arranca este luns coas declaracións das testemuñas —os procesados farano en último lugar— despois de que o pasado 2 de febreiro se celebrase unha vista de cuestións previas. Nela, as defensas cuestionaron a competencia do tribunal e a validez das probas obtidas mediante rexistros e intervencións telefónicas, mentres que a Fiscalía rexeitou estes argumentos. O Ministerio Público sostén que os acusados, xunto a unha empresa de transportes do Porriño, formaban unha estrutura “empresarial, persoal e material” dedicada, entre 2020 e 2022, á fabricación destas embarcacións destinadas a operacións de narcotráfico no sur da Península.

No marco desta investigación detectouse a construción de polo menos 19 lanchas, probándose que algunhas participaran en alixos de haxix. Ademais do contrabando, un dos procesados tamén está acusado de tenencia ilícita de armas e dun delito contra a saúde pública, tras atopárselle no seu domicilio case 300 gramos de haxix e unha pistola detonadora no seu despacho profesional.

Pola súa banda, a Fiscalía reclama o pago de multas que suman máis de 80 millóns de euros para os particulares e de 14 millóns para a empresa implicada. Para esta entidade tamén se solicita a prohibición de obter axudas públicas durante dous anos e a suspensión de calquera actividade comercial relacionada con embarcacións neumáticas por un período dun ano e tres meses.