O alcalde de Vigo, Abel Caballero, defendeu este xoves que o aeroporto da cidade non pode quedar fóra do modelo de subvencións para ter voos, un modelo que, incidiu, se segue noutros aeroportos de España e na terminal de Sá Carneiro no Porto. En declaracións remitidas aos medios, o rexedor remarcou que expertos aeroportuarios coinciden en que “o mercado dos avións está baseado nas subvencións”. “En suma, hai que facer contratos de publicidade ás compañías para que voen“, concluíu.

Por iso, volveu criticar a proposta de Xunta, Deputación e Aena de promocionar os aeroportos en destino, e esixiu novamente ás administracións autonómica e provincial que cofinancien co Concello eses contratos de publicidade para implantar rutas desde Peinador. “O que sucede é que non queren que haxa voos desde Vigo“, proclamou, e acusou a ambas as institucións de pretender “pechar Peinador”. O alcalde volveu acusar á Xunta de pagar voos desde A Coruña e desde Santiago, cualificando a situación como unha “confrontación en contra desta cidade”.

Desde as filas do PP, Luisa Sánchez defendeu en reiteradas ocasións a necesidade de impulsar rutas desde a terminal viguesa, pero lembrou que o modelo de subvencións que defende o alcalde resultou un fracaso. Así, sinalou que, tras máis de 10 millóns de euros gastados nos últimos anos en contratos publicitarios para implementar rutas, ningunha das conexións se consolidou no tempo.