O Tribunal de Instancia, na súa sección de Instrución de Vigo, citou a declarar en calidade de investigada á concelleira de Seguridade da cidade olívica, Patricia Rodríguez Calviño. Esta citación prodúcese no marco da causa aberta para depurar responsabilidades polo accidente mortal da atracción ‘Saltamontes‘, que tivo lugar durante as festas da parroquia de Matamá en agosto de 2024.
Ata o momento, o procedemento mantiña como investigados ao dono da atracción, ao presidente da comisión de festas e á propia comisión como entidade. Porén, a investigación deu un xiro coa citación doutras tres persoas que deberán comparecer ante o xuíz o vindeiro 3 de febreiro: a mencionada concelleira, o xefe da área municipal de Seguridade, Antonio V.M., e o perito que realizou a inspección anual da atracción, Antonio L.A.
O accidente que motiva esta causa xudicial ocorreu na madrugada do 3 de agosto de 2024. Segundo as pescudas iniciais, unha avaría mecánica no brazo da atracción provocou que o habitáculo saíra proxectado, un sinistro que lle custou a vida a un home de 36 anos. Con estas novas citacións, a xustiza busca determinar se existiron fallos na cadea de inspeccións, permisos e supervisión municipal necesarios para o funcionamento da atracción de feira.
A OPOSICIÓN PIDE Á CONCELLEIRA QUE DIMITA
Os grupos da oposición no Concello de Vigo, PP e BNG, esixiu este xoves o cesamento inmediato da concelleira de Seguridade, Patricia Rodríguez Calviño, tras coñecerse que foi citada polo xulgado para declarar en calidade de investigada polo accidente mortal do ‘Saltamontes’, ocorrido en agosto de 2024.
A presidenta do PP vigués, Luisa Sánchez, sinalou que esta decisión da xuíza, de citar á concelleira, pero tamén ao xefe da área municipal de Seguridade, Antonio V.M., “é dunha extrema gravidade”.
Igualmente, advertiron ao alcalde, Abel Caballero, de que tampouco pode “permanecer impasible nin en silencio”, e pediron tamén que aparte das súas funcións ao xefe da área de Seguridade, e anunciou que, de non producirse eses cesamentos, presentarán unha moción urxente no pleno do próximo luns.
“537 DÍAS DE INACEPTABLE SILENCIO”
Pola súa banda, o portavoz municipal do BNG, Xabier Pérez Igrexas, constatou que a citación da edila socialista e do xefe de Seguridade reflicten que “hai indicios sólidos de responsabilidade municipal” en relación co “control neglixente”, pola falta dun protocolo municipal de inspeccións e dunha instrución clara para ordenar o precinto desta atracción, que non reunía as condicións.
A isto súmanse, apuntaron o edil nacionalista, a “negativa reiterada” de Patricia Rodríguez a dar explicacións do ocorrido ante o Pleno, o que supón “537 días dun inaceptable silencio”, ademais do bloqueo do goberno municipal á creación dunha comisión de investigación.
Finalmente, Pérez Igrexas confirmou que o BNG está a preparar unha moción de urxencia para presentar no pleno do luns, para esixir responsabilidades ao goberno municipal e para volver reclamar unha investigación a fondo, contribuíndo a aclarar o sucedido e definindo medidas que eviten que un suceso así poida repetirse.
