Axentes da Policía Nacional de Vigo detiveron a tres homes que trataban de fuxir despois de tentar roubar no interior dunha vivenda do barrio de Teis. Segundo informaron fontes policiais, a sala do 091 recibiu unha chamada dunha testemuña, que informaba de que vira a varios individuos entrando pola xanela dunha vivenda e que, ao saberse descubertos, emprenderan a fuxida. Esta testemuña facilitou a descrición dos sospeitosos e mesmo iniciou a persecución pola vía pública tras eles.

A Policía mobilizou efectivos ata o lugar e, tras unha batida pola zona, atoparon a tres homes que trataban de ocultarse dos axentes. A súa aparencia coincidía coa descrición achegada pola testemuña, polo que se lles deu o alto e foron identificados.

Os axentes atoparon un par de luvas negras xunto aos sospeitosos, e ao cachealos interviñéronlles diversas doses de sustancias estupefacientes, así como 350 euros en efectivo. O tres foron detidos e postos a disposición xudicial.

A praza de reforzo (na actualidade non hai xulgado de instrución 8), en funcións de garda, acordou a posta en liberdade do tres detidos por esta causa. Con todo, para un deles si decretou o ingreso en prisión, xa que tiña un requirimento pendente, aínda que por outra causa. Os outros dous investigados deberán comparecer nos xulgados quincenalmente.