A Zona Franca de Vigo e a Universidade de Vigo (UVigo) reforzaron a súa colaboración para impulsar o emprendemento entre o sector universitario, patrocinando o Consorcio un ano máis o Programa Incuvi, nas súas diferentes fases, e o servizo Sucede, destinado á creación de empresas de estudantes. Así, o delegado do Estado, David Regades, mantivo un encontro coa vicerreitora de Estudantado e Empregabilidade, Natalia Caparrini, e Maruxa Álvarez, directora da área de Emprego e Emprendemento da UVigo, co obxectivo de selar o seu compromiso co desenvolvemento do espírito emprendedor no colectivo universitario, segundo recolle Zona Franca nun comunicado.
Este patrocinio pon o foco no programa Incuvi e no servizo Sucede, polo que a Universidade impulsa a creación de empresas do estudantado. Regades subliñou a relevancia destas iniciativas cun socio estratéxico para o Consorcio como é a UVigo, para “trasladar todo ese talento e coñecemento, así como eses posibles proxectos empresariais á sociedade, dinamizando a economía galega“. Tras a reunión con Natalia Caparrini e Maruxa Álvarez, o delegado da Zona Franca de Vigo reafirmou o carácter de “socio fundamental” que xoga a Universidade de Vigo en moitos dos grandes proxectos máis transformadores do Consorcio.
“Sempre insistimos no seu papel referente na dinamización da economía en Galicia e, no caso do emprendemento, a súa capacidade para detectar e valorar o potencial e a viabilidade real das iniciativas do estudantado póndoos na pista de saída para acceder a ferramentas e instrumentos necesarios”, sinalou Regades. Deste xeito, a alianza busca consolidar a UVigo como unha canteira de innovación capaz de converter as ideas académicas en realidades económicas que contribúan ao crecemento de Galicia.
